Majlinda Xhamo, drejtuesja e Zyrës Arsimore në Berat është ndarë nga jeta këtë të enjte, në moshën 57 vjeçare. Mësuesja, aktivistja e shoqërisë civile dhe publicistja e njohur e qytetit të një mbi një dritareve ka mbyllur sytë përgjithmonë duke luftuar deri ditën e fundit me sëmundjen.
Advertisements
Fatkeqësisht, Majlinda Xhamo nuk ia ka dalë kësaj beteje dhe ka lënë në dhimbje familjarët, kolegët, miqtë dhe të gjithë ata që e njihnin.
Nëna dhe bija fisnike e Beratit ka dhënë një kontribut të pakursyer si profesioniste në fushën e arsimit. Ajo rridhte nga një familje arsimtarësh dhe këtë traditë e kishte trashëguar dhe vetë, duke ia dedikuar jetën arsimit dhe mësimdhënies për nxënësit dhe studentët e qytetit të gurtë.
Advertisements
Sëmundja e mundonte prej kohësh, por Majlinda Xhamo nuk u dorëzua në betejën e saj deri ditën e fundit. Ajo do t’i mungoi nga sot bashkëshortit, dy fëmijëve dhe gjithë miqve e kolegëve me të cilët punoi për vite me radhë.
Një mesazh ngushëllimi për ikjen e saj ka shkruar dhe kryebashkiaku Ervin Demo, i cili thotë se Berati humbi sot një bijë shembullore, një grua fisnike, një nënë të dashur, një kolege energjike, një profesioniste të përkushtuar.
“Ky është një nga ato postime që s’dua t’i bëj… Berati sot humbi Majlinda Xhamon, drejtuesen e ZVA! Humbi një bijë shembullore, një grua fisnike, një nënë të dashur, një kolege energjike, një profesioniste të përkushtuar!
Majlinda i dha Beratit kontributin e saj të pakursyer jo vetëm në arsim, por edhe në shoqërinë civile, si një nga zërat më të fuqishëm. Po me aq forcë e luftoi deri ditën e fundit edhe sëmundjen, pa u dorëzuar asnjë moment. Deri në fund…
Lindur në një familje arsimtarësh, u rrit, u martua dhe u bë nënë në Berat, pa iu larguar kurrë dashurisë së saj për Beratin e Magjishëm. Majlinda, këtij qyteti po i mungon që sot! Mendimet e mia janë për familjen e saj, bashkëshortin dhe dy fëmijët”, shkruan kryetari i Bashkisë Berat, Ervin Demo.
Edhe kolegët në Drejtorinë Arsimore të Beratit kanë shkruar një mesazh të ndjerë për kolegen e tyre, duke e cilësuar si një njeri që nuk bëri asnjëherë kompromis kundër parimeve, normave, rregullave e vlerave morale, duke qenë model frymëzimi për cilindo.
“Ajo do të mbahet mend si një menaxhuese e drejtuese e shkëlqyer, si një metodiste, autore librash, dhe aktiviste ndër më të njohurat e shoqerise civile, si një njeri me kontribute të veçanta në fushën e edukimit dhe të mbrojtjes së të drejtave të fëmijëve. Njerëz të tillë mbeten në memorien dhe historinë e një qyteti”, thuhet në njoftimin e Drejtorisë Arsimore Berat.